昨夜在收拾凌亂不堪的案頭。發現一張 CD。
一張內容與我的婚事有關，但未有在播婚宴當晚播出的 CD。
＊ ＊ ＊ ＊ ＊ ＊
一開隻 CD 睇，原來係九寨溝影嘅相。5 月到家陣都成半年，每次睇返輯相都令我諗起呢間咁出眾嘅公司「CxxlWedding」嘅「卓越」服務（？？？），令我頂住條氣。
記得今年 2 月喺會展展覽裏，一次過揀咗兩間公司去影婚紗相。一間係好友 Joanne 同 Dennis 幫襯過，影完後 Janus 睇過佢哋成輯相都好靚，所以已經早喺考慮名單之內，而 3 月 Janus 生日嘅時候，都順利完成第一輯婚紗相。
＊ ＊ ＊ ＊ ＊ ＊
第二間呢間令我頂住條氣嘅「CxxlWedding」，俾我嘅驚喜真係接二連三，層出不窮。但要強調清楚，令我頂住條氣都家陣都未順嘅，係「CxxlWedding」嘅香港職員，並非喺內地由頭到尾對我倆照顧十足嘅員工。
正式 Join Plan 同俾錢前，已經再三向工作人員確認：
「5 月先去四川影相，係咪可以肯定喺擺酒前（8 月 14 日）攞到相簿？」
「我哋收得錢，一定會完成俾客人嘅，結婚呢啲喜慶事，點可以遲交貨？遲交貨，當晚賓客睇唔到就嘥晒啦。」攝影師 Ronnie（幕後老闆）言之鑿鑿咁答。
［按：自己都抵死嘅，明知呢啲係 Salesperson 發夢都識得掉轉背嘅說話，都要催眠自己去信佢。］
早期嘅服務都真係唔錯架，大小事都有打電話嚟提點。當然包括提點我要交尾數啦。
出發前仲會為我哋安排一個 Briefing，提點我哋注意事項。既然有咁好嘅服務，當然欣然接受啦。
＊ ＊ ＊ ＊ ＊ ＊
Briefing 嘅時候當然係問一啲我哋關心而又需要知道嘅細節啦。特別係準備出發前嘅一陣子，四川又再有地震發生；由成都入九寨溝嘅公路又蹋，......。
令我氣頂嘅精彩事，就係由收晒我錢，Briefing 內嘅對答揭開序幕。
整個 20 分鐘唔夠嘅 Briefing，個職員做到嘅係將 Default 咗嘅工作流程背俾我聽，同時佢只能夠好肯定咁答到我 1 個問題：
「影相個時間係可以免費更改一次。」但最後我想改期佢覆我話唔改得。
XYZ.......。
其他我倆所問嘅問題，答案不外乎下面 3 個：
1. 呀，......，等我 Check Check 先，遲啲覆返你哋；
2. 應該無問題嘅，......；
3. 稍後我將內地負責同你哋聯絡嘅同事嘅電話俾你哋，你哋可以問佢。
來來回回白白浪費咗我倆個幾鐘！
＊ ＊ ＊ ＊ ＊ ＊
喺四川，由喺機場接我哋開始，直到完成整個攝影過程，內地每一位員工，都係非常非常好嘅員工，服務態度絕對值得嘉許！強烈感受到佢哋一顆熱誠嘅心！
令我頂住條氣嘅唔係呢一個環節，所以在此不作詳述。
＊ ＊ ＊ ＊ ＊ ＊
5 月 20 日影完相，5 月 27 日返到香港。6 月 2 日喇，咦？又話我哋返香港之後，會主動聯絡我哋，跟進相簿嘅事嘅？
Janus 打去問跟進嘅情況，得到嘅回覆係：
「你唔話我哋知你哋揀邊啲相，我哋點準備做相簿？」態度當然唔係誠懇嗰隻啦。
「你哋又話會主動聯絡我哋，你唔俾 Form 我哋，唔通知我哋應該點做，我哋點話你哋知揀邊啲相？」Janus 回覆。
「係咩？你無收到我哋嘅 Email 咩？無同事聯絡你哋咩？咁我 Send 返俾你，你填好覆返我哋跟住就會做稿架喇。」
「我哋 8 月擺酒，要擺酒前收到相簿喎？」
「我哋知道架喇，有 Mark 低喺份單度。」
＊ ＊ ＊ ＊ ＊ ＊
結果甩甩漏漏，搞吓搞吓，搞到 8 月 8 日 18:26 先收到 Email 話第一次稿做好喇，要唔要改？
XYZ~!@......。
咁即係點呀？
［咪即係阿 Ron 你咪駛旨意諗住啲相簿可以擺酒當晚攞出嚟俾人睇囉！］
＊ ＊ ＊ ＊ ＊ ＊
自從 Briefing 開始，想佢哋打電話嚟簡直係妄想。有咩都係用 Email 留訊息俾我哋。
無可奈何之下，終於有電話打嚟。點解？我諗大概係唔想用 Email 留痕話俾我哋知，我哋嘅相簿係無辦法喺我哋早已訂好嘅日子收貨。
XYZ~!@#$%......。XYZ~!@#$%^&.......。
「咁即係點？」
「我哋免費額外幫你做一隻 CD，咁你啲相咪一樣可以喺席上播俾賓客睇。」
［按：咁皇恩浩蕩呀！又免費，又額外，我驚我受唔起呀！俾啲唔值錢又唔係我想要嘅嘢我就可以擺平件事嘅咩？將啲相擺埋一齊，問我攞隻歌加入去，我自己整都整得好過你啦！！！］
大家請注意，我放咗上 YouTube 你哋睇到嘅一段片，係經過我後期加工而成。
你求其俾啲我唔打算要嘅嘢我去息事寧人，都俾返少少誠意我睇吓呃！一早知道我 8 月 14 日擺酒，大家又估吓佢幾時幫我起到貨通知我？？？
答案請睇下圖。
電話都無過呀！靜雞雞 Send 隻貓俾我就算數，8 月 13 日 17:54 分呀！家陣係咪我無 24 小時全天候 Check Email，又或者無打電話追你，係我嘅錯呀！
XYZ~!@#$%^&.......。XYZ~!@#$%^&.......。XYZ~!@#$%^&.......。
＊ ＊ ＊ ＊ ＊ ＊
最後，我幾時可以收到我應該得到嘅相簿呢？
其實好快之嘛，8 月 29 日我就已經可以登門造訪，攞到相簿喇。
XYZ~!@#$%^&.......。XYZ~!@#$%^&.......。XYZ~!@#$%^&.......。XYZ~!@#$%^&.......。
＊ ＊ ＊ ＊ ＊ ＊
唔知係我唔好彩，還是呢個係佢哋慣性嘅工作流程同服務質素，總之整個過程，同呢間「傑出」公司嘅香港職員聯絡就每每令我氣頂。
要評分嘅話，要分得好清楚：
內地職員：10 分滿分會攞足 10 分！除咗所影嘅相質素高之外，徹頭徹尾都服務細心。甚至好多工作範圍以外嘅事，都幫我哋安排好晒！
香港職員：10 分滿分我會給予 2 分。應得嘅 1 分係跟進服務做得足——收齊錢之前。另外應得嘅 1 分係，雖然完全唔能夠依照所訂日子交貨，起碼都唔係爛尾，攞得到我買嘅嘢。
但係，當你今日同樣用 6 個大洋，去買 1 份兩星期前嘅報紙，有咩用呢？
XYZ~!@#$%^&.......。XYZ~!@#$%^&.......。XYZ~!@#$%^&.......。XYZ~!@#$%^&.......。
＊ ＊ ＊ ＊ ＊ ＊
by Ron
沒有留言:
發佈留言