好耐無踢過波。亦都好耐無踢過一場好波。今晚終於有好轉。
今晚贏波無乜特別意義，但係隊波踢得出一個隊形，呢樣先係最開心。但係，並唔能夠每分每秒都維持呢個隊形。一贏開波領先之後，突然間個個都好似美斯上身咁，自己去晒。
球隊早段六上六落，交叉補位、No Look Pass、One-two 突破、閃電傳球，確實係勢如破竹。當贏到 2:0 之後，舊病開始復發喇，可能個個都大汗，開始將自己當咗係一條球場濕毛巾－－死扭。
結果係點？咪輸返 2:2 囉。
轉捩點係皇牌 10 號阿健喺呢個時候閃電式嘅雷獸射球，迅速將比數拉開至 4:2，對手即時被打沉，雖然雙方再有入球，但都保持勝果。阿健貫徹佢生活中嘅強項－－左右開弓，無疑是應記一功。
對自己而言，做返多啲劇烈運動，出身汗，確在醒神好多。加上今晚做柱男，真係醒到唔醒。
中咗幾多呢？自己都數唔晒。淨係記得第 1 次中柱係文文 Long Pass，面對 Keeper 射門被擋出落返自己腳下再射第 2 腳。喺細禁區入面射中條近柱，呢一下嘅技術，真係少啲都射咗網側......。>.<
再嚟係禁區入面偷到個波，細禁區 K 角位，離門都唔夠七碼，一個窩利抽射，勁！除咗力度勁之外，真係意想不到咁又射中近柱，仲要係近柱內側！然後勁到個波係打橫飛去撞埋條遠柱嘅柱面！出界......。
比賽末段，客串 Keeper 嘅隊長 Vincent，引球出擊右路傳中，當我離門 20 碼接應之後，第一時間再嚟一個衝力射球！當然係高飛曲墜急彎向球門。掂喇啩？笠過埋 Keeper.....。結果都係要射中眉角彈出界......。
真係未試過一晚中咁多次，左右腳都中。我啲技術幾時升呢升得咁快？
沒有留言:
發佈留言