好心情

　　今日星期五，成日都無乜心情做嘢，HEA 住咁做，終於等到收工。

　　收工一刻去洗手間洗手時候，彎低手準備洗手時無端端一頭撞埋牆上面玻璃，都撞得幾應棍。

　　後來先知道，大約嗰個時間，五點半左右，係侄仔出世時候。世侄呀世侄，你係咪第一次就咁樣同大伯打招呼？

　　表弟更話我知，又係差唔多嘅時間，大舅母喺屋企不停咁打噴嚏，然後就同我表弟講：「出世喇出世喇！」

　　咁橋？

　　無論如何，阿昇通知我呢個都係一個萬分值得高興嘅消息：2010 年 7 月 23 日，我多咗個侄仔，「升呢」做咗大伯。^o^