銀行星期日

　　市民：「唔該我想轉錢。」

　　職員：「先生唔好意思，今日我哋幫唔到你轉錢。」

　　市民：「你開門有咩理由無錢轉呀？」

　　職員：「唔好意思，而家五天結算，所以星期日係轉唔到錢。」

　　市民：「咁我想買啲美金，得嘛？」

　　職員：「唔好意思呀，今日唔可以幫你轉美金。」

　　市民：「你開門有咩理由無美金轉呀？」

　　職員：「唔好意思，而家五天結算，所以星期日係轉唔到美金……。」

　　市民：「咁我想做張定期，得嘛？」

　　職員：「唔好意思呀，今日唔可以幫你做定期。」

　　市民：「你開門有咩理由無定期做呀？」

　　職員：「唔好意思，而家五天結算，所以星期日係做唔到定期……。」

　　市民：「咩都唔做得，咁你哋開嚟做咩？！」

　　職員：「我哋有專業嘅同事可以介紹啲儲蓄計劃俾你，又可以為你提供市場資訊，例如有咩市場基金可以買，仲有你可以申請我哋嘅 Credit Card……。」

　　市民：「好，我都啱啱想買中國基金，你幫我落 Order。」

　　職員：「唔好意思呀，今日唔可以幫你買基金……。」

　　市民：「又點解唔得呀？」

　　職員：「唔好意思，而家五天結算，所以星期日係轉唔到美金；星期日無市，又買唔到基金……。」

　　市民：「都唔明你哋星期日咩都唔得，開嚟做乜？！算喇，我要 Close Account，你幫我打張本票！」

　　職員：「唔好意思，而家五天結算，所以星期日係做唔到本票……。」

　　市民：「 ……。」


＊　　＊　　＊　　＊　　＊


　　市民向經理投訴。

　　市民：「我要投訴！我要投訴！你哋真係可恥！星期日開門都無得存款、轉錢、買外幣、開本票……。」

　　經理：「唔好意思，而家五天結算，所以星期日只係提供非櫃檯服務。」

　　市民：「咁叫方便市民咩？你開得門可以做晒各種服務先叫做方便市民！」

　　經理：「其實先生你可以喺周一至周五辦理你需要嘅服務，星期日我哋只係提供財富管理服務俾有需要人仕……。」

　　市民：「你咁咩意思呀？即係話我無財富俾你管理？！」

　　經理：「當然唔係咁意思啦……。」

　　市民：「我財富管理已經交俾我朋友負責，我而家只係需要星期日辦理櫃檯服務！」

　　經理：「唔好意思，而家五天結算，所以星期日只係提供非櫃檯服務……先生你可以喺周一至周五辦理你需要嘅服務。」

　　市民：「我就係喺周一至周五辦理唔到我需要嘅嘢，所以星期日先到銀行，你又話無得做！我聽你啲高層講開七天係方便市民喎！你連無提供櫃檯服務都唔講明，真可恥！！！」

　　經理：「其實呢啲係高層嘅決定……。」

　　市民：「你真可恥，扭曲你高層啲決定……唔理！ 我要辦理我需要嘅服務！」

　　經理：「唔好意思，而家五天結算，所以星期日只係提供非櫃檯服務……。」

　　市民：「咁你喺度做乜？」

　　經理：「開門同閂門……。」

　　市民：「咁你喺度做乜？」

　　職員：「人肉廣告版。」

　　市民：「咁有乜做到？」

　　職員：「等放工……。」

　　市民：「……。」

　　市民：「咁你喺度做乜？」

　　職員：「做樣俾高層睇！」

　　賊人：「打……打……打……劫……！」

　　職員：「先生，對唔住，今日星期日無人開夾萬，請你聽日再嚟過，……。仲有冇其它嘢幫到你呀？」

　　賊人：「打……打……打……劫……呀！」

　　職員：「先生，對唔住，今日星期日無人開夾萬，請你聽日再嚟過，……。阿先生呀，其實做賊好危險，不如你買返份保險先啦！我可以介紹俾你！」

　　賊人：「你想呃我唔識嘢呀？做犯法嘢唔受保架喎！叫你經理出來，我要 Complaint！」

　　職員：「唔好意思，今日係星期日，淨係 Sales 先要開工，如果你要見經理，麻煩你聽日嚟過吖！！！」