瞓唔著

　　捱咗成個星期夜睇歐洲國盃，好明顯個人已經嚴重透支、無晒電，簡直就係行屍走肉，今朝更加唔識起身去踢波添。

　　上一屆歐國盃，甚至早兩年世界盃，我都無咁好心情，咁好興緻去場場追，今年唔知做乜咁作死，自八八年荷蘭攞歐洲國家盃嗰年係咁場場追，追到決賽之後嗰日考中史都無溫過書之外，差唔多成廿年無試過咁狂熱去睇波，可能係迴光反照嘅先兆。

　　雖然攰到殘、殘到顛，但係家陣都瞓唔著，唔係因為慣咗夜瞓，而係今晚睇完陳慧琳個演唱會，仲未將情緒回復平靜，喺屋企左搞右整都仲未搵到周公個女。

　　整晚表演都幾滿意，跳舞場面好多，淨係頭兩 Part 見到 Kelly 起勢咁 Shake Shake 佢條纖腰，真係鼻血都俾佢 Shake 晒出嚟，差啲失血暴斃。然而最重要嘅係，演唱會末段，我最鍾意嗰三隻歌《最愛演唱會》、《最佳位置》、《對你太在乎》一次過唱晒，所以非常滿足。

　　話時話，對上一次睇演唱會係幾時？自己都已經唔係太記得，只係好清楚記得年頭李克勤開演唱會無睇，出咗碟都仲未有時間去買返嚟睇。

　　由今朝起身一刻開始，今日全程所做每一件事，都令我想起好多好嘢，個腦實在唔夠 RAM 去行，可能因為咁，我個 Harddisk 仲行緊，因此沒法去入睡，呆呆望窗邊雨水……。